ಚಿಕ್ಕಬಳ್ಳಾಪುರ, : ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು ನಗರ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಕೊಲೆ ಪ್ರಕರಣದಲ್ಲಿ ಆರು ಆರೋಪಿಗಳನ್ನು ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಶ್ರೀ ಕುಶಲ್ ಚೌಕ್ಷೆ (ಐಪಿಎಸ್) ಅವರ ಮಾರ್ಗದರ್ಶನದಲ್ಲಿ ನಡೆದ ಈ ಕಾರ್ಯಾಚರಣೆಗೆ ಕೇಂದ್ರ ವಲಯದ ಪೊಲೀಸ್ ಮಹಾನಿರೀಕ್ಷಕರಾದ ಶ್ರೀ ಲಾಬುರಾಂ (ಐಪಿಎಸ್) ಅವರು ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
ಪ್ರಕರಣದ ವಿವರ:
ದೊಡ್ಡಬಳ್ಳಾಪುರ ತಾಲ್ಲೂಕು ಬಿಸವನಹಳ್ಳಿ ಗ್ರಾಮದ ಯಲ್ಲಪ್ಪ ಎಂಬುವವರು ಮಾರ್ಚ್ ೨೭ರಂದು ನೀಡಿದ ದೂರಿನಂತೆ ಪ್ರಕರಣ ದಾಖಲಾಗಿದೆ. ದೂರಿನ ಪ್ರಕಾರ, ಅವರ ತಮ್ಮನಾದ ಸಾಧಿಕ್ @ ಶಿವಕುಮಾರ್ ಅವರು ಮಾರ್ಚ್ ೨೬ರಂದು ಸಂಜೆ ೭.೩೦ ಗಂಟೆಗೆ ತನ್ನ ಹೆಂಡತಿ ರೇಷ್ಮಾ ಅವರ ಮನೆಗೆ ಹೋಗಿದ್ದರು. ಮಾರ್ಚ್ ೨೭ರಂದು ಬೆಳಿಗ್ಗೆ ಸಾಧಿಕ್ ಸಾವನ್ನಪ್ಪಿರುವ ವಿಚಾರ ತಿಳಿದು ಬಂದಿದೆ. ಈ ಸಾವಿನಲ್ಲಿ ರೇಷ್ಮಾ ಮತ್ತು ಶಾರೂಖ್ ಮೇಲೆ ಅನುಮಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ ಗೌರಿಬಿದನೂರು ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು.
ಆರೋಪಿಗಳ ಬಂಧನ:
ಚಿಕ್ಕಬಳ್ಳಾಪುರ ಜಿಲ್ಲೆಯ ಪೊಲೀಸ್ ವರಿಷ್ಠಾಧಿಕಾರಿಗಳಾದ ಶ್ರೀ ಕುಶಲ್ ಚೌಕ್ಷೆ, ಅಪರ ಪೊಲೀಸ್ ವರಿಷ್ಠಾಧಿಕಾರಿಗಳಾದ ಶ್ರೀ ಜಗನ್ನಾಥರೈ ಕೆ.ಎಸ್.ಪಿ.ಎಸ್., ಮತ್ತು ಉಪ ವಿಭಾಗದ ಪೊಲೀಸ್ ಉಪಾಧಿಕ್ಷಕರಾದ ಶ್ರೀ ಪ್ರಕಾಶ್ ಆರ್ ಕೆ.ಎಸ್.ಪಿ.ಎಸ್. ಅವರ ಮಾರ್ಗದರ್ಶನದಲ್ಲಿ ವಿಶೇಷ ತಂಡವನ್ನು ರಚಿಸಲಾಗಿತ್ತು.
ಗೌರಿಬಿದನೂರು ವೃತ್ತದ ಸಿಪಿಐ ಅಂಜನ್ ಕುಮಾರ್, ಗೌರಿಬಿದನೂರು ನಗರ ಠಾಣೆ, ಮಂಚೇನಹಳ್ಳಿ ಠಾಣೆ ಮತ್ತು ಗ್ರಾಮಾಂತರ ಠಾಣೆಯ ಪೊಲೀಸ್ ಸಬ್ ಇನ್ಸಪೆಕ್ಟರ್ಗಳಾದ ಹರೀಶ್, ಪುನೀತ್ ನಂಜರಾಜಯ್ಯ, ವರಲಕ್ಷ್ಮಿ, ಲಲಿತಮ್ಮ ಹಾಗೂ ಸಿಬ್ಬಂದಿಗಳಾದ ಶ್ರೀನಿವಾಸರೆಡ್ಡಿ, ರಿಜ್ವಾನುಲ್ಲಾ, ಗೋಪಾಲ, ಕೃಷ್ಣಪ್ಪ, ಲಿಂಗಪ್ಪ, ಮಹಾಂತೇಶ, ಮರುಳುಸಿದ್ದೇಶ್ವರಗೌಡ, ನವೀನ್ ಕುಮಾರ್, ಉಮೇಶ್ ಶಿರ್ಶ್ಯಾಡ್, ಸಿದ್ದರಾಮ ಹಾಗೂ ಜಿಲ್ಲಾ ಪೊಲೀಸ್ ಕಚೇರಿಯ ತಾಂತ್ರಿಕ ಸಿಬ್ಬಂದಿಗಳಾದ ರವಿಕುಮಾರ್ ಮತ್ತು ಮುನಿಕೃಷ್ಣ ಅವರ ಸಹಕಾರದೊಂದಿಗೆ ಆರೋಪಿಗಳನ್ನು ಬಂಧಿಸಲಾಯಿತು.
ಬಂಧಿತ ಆರೋಪಿಗಳ ಪಟ್ಟಿ:
ಪೊಲೀಸರು ಒಟ್ಟು ಆರು ಜನರನ್ನು ಬಂಧಿಸಿದ್ದು, ಅವರೆಂದರೆ:
೧. ರೇಷ್ಮಾ (ಸಾಧಿಕ್ @ ಶಿವಕುಮಾರ್ ಅವರ ಪತ್ನಿ) – ಗೌರಿಬಿದನೂರು ನಗರ
೨. ಶಾರೂಖ್ (ಲೇಟ್ ಸೈಯದ್ ಲಿಯಖತ್ ಅವರ ಪುತ್ರ) – ಗೌರಿಬಿದನೂರು ನಗರ
೩. ಸಿದ್ಧಾ ಬತ್ತುನಿ ಪಾರ್ಥು @ ಲಲಿತ ಸಾಯಿ (ವಿಜಯ್ ಕುಮಾರ್ ಅವರ ಪುತ್ರ) – ಆಂಧ್ರಪ್ರದೇಶ
೪. ಆಲೂರಿ ಆನಂದ ಬಾಬು @ ಆನಂದ (ಸಾಂಬಯ್ಯ ಅವರ ಪುತ್ರ) – ಆಂಧ್ರಪ್ರದೇಶ
೫. ದಂತಂ ರಾಮು @ ರಾಮು (ದಂತಂ ದಾನೀಯಲು ಅವರ ಪುತ್ರ) – ಆಂಧ್ರಪ್ರದೇಶ
೬. ಕಾರುಮೂರಿ ಅಕ್ಷಯ್ @ ಅಕ್ಷಯ್ (ಕಾರುಮೂರಿ ರವಿ ಅವರ ಪುತ್ರ) – ಆಂಧ್ರಪ್ರದೇಶ
ಅಪರಾಧದ ಸ್ವರೂಪ:
ಮಾರ್ಚ್ ೨೬ರಂದು ರೇಷ್ಮಾ ಅವರ ಮನೆಯಲ್ಲಿ ಮರದ ರೀಪಿಸ್ಗಳಿಂದ ಸಾಧಿಕ್ @ ಶಿವಕುಮಾರ್ ಅವರಿಗೆ ಹೊಡೆದು ಕೊಲೆ ಮಾಡಿರುವುದಾಗಿ ಆರೋಪಿಗಳು ವಿಚಾರಣೆಯ ವೇಳೆ ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಶ್ಲಾಘನೆ:
ಈ ಪ್ರಕರಣದಲ್ಲಿ ಆರೋಪಿಗಳನ್ನು ಬಂಧಿಸುವಲ್ಲಿ ತೊಡಗಿಸಿಕೊಂಡ ಸಿಬ್ಬಂದಿಯ ಕಾರ್ಯವನ್ನು ಚಿಕ್ಕಬಳ್ಳಾಪುರ ಜಿಲ್ಲೆಯ ಪೊಲೀಸ್ ವರಿಷ್ಠಾಧಿಕಾರಿ ಶ್ರೀ ಕುಶಲ್ ಚೌಕ್ಷೆ ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ಜಿಲ್ಲೆಯ ಪೊಲೀಸರ ಕರ್ತವ್ಯವನ್ನು ಕೇಂದ್ರ ವಲಯದ ಪೊಲೀಸ್ ಮಹಾನಿರೀಕ್ಷಕರಾದ ಶ್ರೀ ಲಾಬುರಾಂ (ಐಪಿಎಸ್) ಅವರು ಶ್ಲಾಘಿಸಿದ್ದಾರೆ ಎಂದು ಪೊಲೀಸ್ ವರಿಷ್ಠಾಧಿಕಾರಿಗಳು ತಿಳಿಸಿದ್ದಾರೆ.
Post a Comment