ವಿಜಯಪುರ, ಏಪ್ರಿಲ್ 2: ಕಲಬುರಗಿಯ ಮಹಾನಗರ ಪಾಲಿಕೆ ಸಭೆಯಲ್ಲಿ ಇರಾನಿನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿಯವರ ಹತ್ಯೆಗೆ ಸಂತಾಪ ಸೂಚಿಸಿರುವ ಘಟನೆ ವಿವಾದಕ್ಕೆ ಕಾರಣವಾಗಿದೆ. ವಿಜಯಪುರದ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರು ಈ ಕೃತ್ಯವನ್ನು ತೀವ್ರವಾಗಿ ಖಂಡಿಸಿದ್ದಾರೆ.
ಏನಿದು ಪ್ರಕರಣ?
ಕಲಬುರಗಿ ಮಹಾನಗರ ಪಾಲಿಕೆಯ ಇತ್ತೀಚಿನ ಸಭೆಯಲ್ಲಿ ಆಯುಕ್ತರು ಮತ್ತು ಇತರ ಸದಸ್ಯರು ಇರಾನಿನ ನಿರಂಕುಶ ಪ್ರಭುತ್ವವಾದಿ, ಪ್ರಜಾ ಪೀಡಕ, ಮಹಿಳಾ ಹಕ್ಕುಗಳನ್ನು ಕಸಿದುಕೊಂಡ ಆಡಳಿತಗಾರ ಅಯತೊಲ್ಲಾ ಅಲಿ ಖಮೇನಿಯವರ ಹತ್ಯೆಗೆ ಸಂತಾಪ ಸೂಚಿಸಿದ್ದಾರೆ. ಈ ಕ್ರಮವನ್ನು ಸ್ಥಳೀಯ ಸಂಸ್ಥೆಗಳ ಶಿಷ್ಟಾಚಾರಕ್ಕೆ ವಿರುದ್ಧವೆಂದು ಪರಿಗಣಿಸಲಾಗಿದೆ.
ಯತ್ನಾಳ್ ಆಕ್ರೋಶ
ವಿಜಯಪುರ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರು ಈ ವಿಚಾರವಾಗಿ ಸಿಡಿದೆದ್ದಿದ್ದಾರೆ. ಅವರು ಮಾತನಾಡಿ, “ಶಿಷ್ಟಾಚಾರವನ್ನು ಬಲ್ಲ ಆಯುಕ್ತರು ಸೇರಿದಂತೆ ಪಾಲಿಕೆ ಸದಸ್ಯರು ಖಮೇನಿಯ ಹತ್ಯೆಗೆ ಸಂತಾಪ ಸೂಚಿಸಿರುವುದು ಅವರ ಬೌದ್ಧಿಕ ದಾರಿದ್ರ್ಯತನ ಮತ್ತು ಬುದ್ಧಿಗೇಡಿತನವನ್ನು ಸೂಚಿಸುತ್ತದೆ” ಎಂದು ತೀವ್ರ ನಿಂದಿಸಿದರು.
ಅವರು ಮುಂದುವರಿಸಿ, “ಪಹಲ್ಗಾಮ್ ನಾಗರಿಕರು, ಕಾಶ್ಮೀರಿ ಪಂಡಿತರು, ಮತ್ತು ದೇಶದ ಗಾಡಿಯನ್ನು ರಕ್ಷಿಸುವ ಸಮಯದಲ್ಲಿ ಪ್ರಾಣವರ್ಪಿಸಿದ ವೀರ ಯೋಧರಿಗೆ ಮಿಡಿಯದ ಕಂಬನಿ, ಆದರೆ ಖಮೇನಿ ಸತ್ತಾಗ ಸರ್ಕಾರದ ಅಧಿಕೃತ ಕಾರ್ಯಕ್ರಮದಲ್ಲಿ ಸಂತಾಪ ಸೂಚಿಸಿರುವುದು ಖಂಡನೀಯ” ಎಂದರು.
ಕ್ರಮ ಕೈಗೊಳ್ಳಬೇಕು: ಯತ್ನಾಳ್
ಶಾಸಕ ಯತ್ನಾಳ್ ಅವರು ಸರ್ಕಾರಕ್ಕೆ ತಾಕೀತು ಮಾಡಿದ್ದಾರೆ. “ಆಯುಕ್ತರು ಸೇರಿದಂತೆ ಸದಸ್ಯರ ಮೇಲೆ ಸರ್ಕಾರ ಕೂಡಲೇ ಕ್ರಮ ಕೈಗೊಳ್ಳಬೇಕು. ತಾವು ವಾಸಿಸುತ್ತಿರುವ ನೆಲ, ಸಂಸ್ಕೃತಿಗೆ ಬೆಲೆ ಕೊಟ್ಟು ವರ್ತಿಸಬೇಕು. ಬೇರೆ ರಾಷ್ಟ್ರದ ಪ್ರಜೆಗಳಂತೆ ವರ್ತಿಸುವುದನ್ನು ನಿಲ್ಲಿಸಬೇಕು” ಎಂದು ಅವರು ಆಗ್ರಹಿಸಿದ್ದಾರೆ.
ವಿವಾದದ ಹಿನ್ನೆಲೆ
ಇರಾನಿನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರು ತಮ್ಳು ಕಠಿಣ ಆಡಳಿತ, ಮಹಿಳಾ ಹಕ್ಕುಗಳ ಮೇಲಿನ ನಿರ್ಬಂಧಗಳು ಮತ್ತು ಪ್ರಜಾಪೀಡನೆಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಟೀಕೆಗೆ ಗುರಿಯಾಗಿದ್ದಾರೆ. ಅಂತಹ ವ್ಯಕ್ತಿಯ ಹತ್ಯೆಗೆ ಭಾರತದ ನಗರ ಪಾಲಿಕೆಯೊಂದು ಸಂತಾಪ ಸೂಚಿಸಿರುವುದು ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ಪಾಲಿಕೆ ಆಯುಕ್ತರು ಮತ್ತು ಸದಸ್ಯರ ವಿರುದ್ಧ ಸೂಕ್ತ ಶಿಸ್ತು ಕ್ರಮ ಕೈಗೊಳ್ಳಬೇಕೆಂದು ಯತ್ನಾಳ್ ಅವರು ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದಾರೆ. ಈ ವಿಚಾರದಲ್ಲಿ ಸ್ಪಷ್ಟನೆ ಕೋರಿ ಜನತೆ ಕೂಡ ಒತ್ತಡ ಹೇರುತ್ತಿದ್ದಾರೆ.
Post a Comment