ತುಮಕೂರು: ತುಮಕೂರು ಜಿಲ್ಲಾ ಪೊಲೀಸ್ ಇಲಾಖೆಯು ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ರಾತ್ರಿ ಸಮಯದಲ್ಲಿ ಒಂಟಿಯಾಗಿ ಹೋಗುತ್ತಿದ್ದ ಗಂಡಸರನ್ನು ಗುರಿ ಮಾಡಿ ಸುಲಿಗೆ ಮಾಡುತ್ತಿದ್ದ 04 ಜನ ತೃತೀಯ ಲಿಂಗಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ. ಶಿರಾ ನಗರ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದ Cr.No. 223/2026 ಪ್ರಕರಣದ ತನಿಖೆಯ ಹಿನ್ನೆಲೆಯಲ್ಲಿ ಈ ಕಾರ್ಯಾಚರಣೆ ನಡೆಸಲಾಗಿದೆ.
▪️ ದೂರುದಾರರು: ಪ್ರಯಾಣಿಕರು (ಹೆಸರು ಗೌಪ್ಯ)
▪️ ಘಟನೆ ದಿನಾಂಕ & ಸಮಯ: 14-06-2026, ಬೆಳಗ್ಗೆ 4:00 ಗಂಟೆ
▪️ ಸ್ಥಳ: ತುಮಕೂರು-ಹಿರಿಯೂರು NH-48, ಸಿರಾ ಸಮೀಪದ ರೆಸ್ಟ್ ಏರಿಯಾ
▪️ ಪ್ರಕರಣ ಸಂಖ್ಯೆ: Cr.No. 223/2026
▪️ ಕಲಂ: 308(2) BNS
▪️ ಸುಲಿಗೆ ವಿವರ: ಟೈಟಾನ್ ವಾಚ್, 2 ಬೆಳ್ಳಿ ಉಂಗುರಗಳು, ₹5,000 ನಗದು, ಮೊಬೈಲ್ ಮೂಲಕ ₹4,000 PhonePe ವರ್ಗಾವಣೆ
ದೂರಿನ ಪ್ರಕಾರ, ದಿನಾಂಕ 14-06-2026 ರಂದು ಬೆಳಗ್ಗೆ 4 ಗಂಟೆ ಸಮಯದಲ್ಲಿ, ತುಮಕೂರು-ಹಿರಿಯೂರು NH-48 ರಸ್ತೆಯ ಸಿರಾ ಸಮೀಪವಿರುವ ರೆಸ್ಟ್ ಏರಿಯಾದ ಬಳಿ ದೂರುದಾರರು ವಿಶ್ರಾಂತಿಗೆಂದು ಕಾರನ್ನು ನಿಲ್ಲಿಸಿ ಕಾರಿನಲ್ಲಿ ಕುಳಿತಿದ್ದರು. ಆ ಸಮಯದಲ್ಲಿ 5 ಜನ ಮಂಗಳಮುಖಿಯರು ಅವರ ಬಳಿ ಬಂದು ಹಣ ಕೇಳಿದ್ದಾರೆ. ದೂರುದಾರರು ಹಣ ನೀಡಲು ನಿರಾಕರಿಸಿದಾಗ, ಅವರು ಹಿಡಿದುಕೊಳ್ಳಲು ಪ್ರಯತ್ನಿಸಿ, "ಕೂಗಿಕೊಂಡು ಜನ ಸೇರಿಸುತ್ತೇವೆ" ಎಂದು ಬೆದರಿಸಿ, ದೂರುದಾರರ ಬಳಿಯಿದ್ದ ಟೈಟಾನ್ ವಾಚ್, ಎರಡು ಬೆಳ್ಳಿಯ ಉಂಗುರಗಳು, ₹5,000 ನಗದು ಹಣ ಮತ್ತು ಮೊಬೈಲ್ ಮೂಲಕ ₹4,000 ವರ್ಗಾವಣೆ ಮಾಡಿಸಿಕೊಂಡು ಪರಾರಿಯಾಗಿದ್ದಾರೆ.
ತುಮಕೂರು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಾದ ಶ್ರೀ ಕೆ.ವಿ. ಅಶೋಕ್ (IPS) ಅವರ ಮಾರ್ಗದರ್ಶನದಲ್ಲಿ, ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿಗಳಾದ ಸಿ. ಗೋಪಾಲ್ ಮತ್ತು ಪುರುಷೋತ್ತಮ ಎಂ.ಎಲ್. ಅವರ ನೇತೃತ್ವದಲ್ಲಿ, ಶಿರಾ ಉಪವಿಭಾಗದ ಡಿ.ವೈ.ಎಸ್.ಪಿ. ಬಿ.ಕೆ. ಶೇಖರ್ ಅವರ ಮಾರ್ಗಸೂಚಿಯಂತೆ ತನಿಖೆ ಆರಂಭವಾಯಿತು.
1. ರೂಪ @ ಶಂಕರನಾಯ್ಕ ಬಿನ್ ನಾರಾಯಣ ನಾಯ್ಕ, 26 ವರ್ಷ, ಟ್ರಾನ್ಸ್ ಜೆಂಡರ್, ಕೆರೆತಾಂಡಾ, ಬಳ್ಳಾರಿ (ತಾಲೂಕು & ಜಿಲ್ಲೆ).
2. ರಾಗಿಣಿ @ ಯೋಗೀಶ.ಜಿ.ಆರ್ ಬಿನ್ ರಮೇಶ್.ಜಿ.ಆರ್, 25 ವರ್ಷ, ಟ್ರಾನ್ಸ್ ಜೆಂಡರ್, ಗೋಪಾಲ ಕಾಲೋನಿ, ತರೀಕೆರೆ (ತಾಲೂಕು), ಚಿಕ್ಕಮಗಳೂರು (ಜಿಲ್ಲೆ).
3. ಕನಸು @ ಕಿರಣ್ ಕುಮಾರ್ ಹೆಚ್.ಆರ್ ಬಿನ್ ರಮೇಶ್, 21 ವರ್ಷ, ಹಿರೇಮರಹಳ್ಳಿ ಗ್ರಾಮ, ಪಾಂಡುಪುರ (ತಾಲೂಕು), ಮಂಡ್ಯ (ಜಿಲ್ಲೆ).
4. ಕೀರ್ತಿ @ ಧನುಶ್ ಬಿನ್ ಸುರೇಶ್, 28 ವರ್ಷ, ಟ್ರಾನ್ಸ್ ಜೆಂಡರ್, ಜೈಪುರ, ಪಿ.ಹೆಚ್.ರಸ್ತೆ, ತುಮಕೂರು.
ಅಪರಾಧ ಪತ್ತೆ ತಂಡವನ್ನು ಶಿರಾ ಪೊಲೀಸ್ ಠಾಣೆಯ PI ಪ್ರವೀಣ್ ಕುಮಾರ್.ವಿ, PSI ಶ್ರೀಮತಿ ರೇಣುಕಾ ಯಾದವ್ ಅವರ ನೇತೃತ್ವದಲ್ಲಿ ರಚಿಸಲಾಯಿತು. ತಂಡದಲ್ಲಿ ದುರ್ಗಯ್ಯ.ಡಿ, ನಾಗರಾಜು, ಜುಂಜಣ್ಣ, ಮಣಿಕಂಠ.ಕೆ.ಎನ್, ಸಿದ್ದೇಶ್, ಗೋಪಿನಾಥ್, ಮಂಜುನಾಥ ಸ್ವಾಮಿ, ತಿಪ್ಪೇಸ್ವಾಮಿ, ಮಂಜುನಾಥ, ಪುಷ್ಪಲತಾ, ಜಯಲಕ್ಷ್ಮಮ್ಮ, ಮಂಗಳಮ್ಮ, ಜ್ಯೋತಿ, ಸುನಿತಾ, ರಾಧಿಕಾ ಸೇರಿದಂತೆ ಹಲವಾರು ಸಿಬ್ಬಂದಿಗಳು ಕಾರ್ಯಾಚರಣೆಯಲ್ಲಿ ತೊಡಗಿದ್ದರು.
ತಂಡವು ಆರೋಪಿಗಳ ಬಗ್ಗೆ ಮಾಹಿತಿ ಸಂಗ್ರಹಿಸಿ, ದಿನಾಂಕ 15-06-2026 ರಂದು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಯಿತು. ಆರೋಪಿಗಳಿಂದ ಸುಲಿಗೆ ಮಾಡಿಕೊಂಡು ಹೋಗಿದ್ದ ₹4,000 ನಗದು, ಟೈಟಾನ್ ವಾಚ್ ಮತ್ತು ಎರಡು ಬೆಳ್ಳಿಯ ಉಂಗುರಗಳನ್ನು ವಶಕ್ಕೆ ಪಡೆದುಕೊಳ್ಳಲಾಯಿತು. ನಂತರ ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಯಿತು.
ಆರೋಪಿಗಳನ್ನು ಬಂಧಿಸಲು ಯಶಸ್ವಿಯಾದ ಪತ್ತೆ ತಂಡವನ್ನು ಮಾನ್ಯ ತುಮಕೂರು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಾದ ಕೆ.ವಿ. ಅಶೋಕ್ (IPS) ರವರು ವಿಶೇಷವಾಗಿ ಪ್ರಶಂಸಿಸಿದ್ದಾರೆ. ಸಾರ್ವಜನಿಕರ ಸುರಕ್ಷತೆ ಮತ್ತು ಆಸ್ತಿ ರಕ್ಷಣೆಯಲ್ಲಿ ಈ ಕಾರ್ಯಾಚರಣೆ ಮಾದರಿಯಾಗಿದೆ.
ರಾತ್ರಿ ಸಮಯದಲ್ಲಿ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸುವ ಒಂಟಿ ಪ್ರಯಾಣಿಕರ ಸುರಕ್ಷತೆಗೆ ಈ ಬಂಧನವು ಮಹತ್ವದ ಸಂದೇಶವನ್ನು ನೀಡಿದೆ. ತೃತೀಯ ಲಿಂಗಿಗಳು ಸುಲಿಗೆ ಚಟುವಟಿಕೆಯಲ್ಲಿ ತೊಡಗಿರುವುದು ಕಂಡುಬಂದಿದ್ದು, ಇನ್ನಷ್ಟು ಆರೋಪಿಗಳು ತನಿಖಾ ವ್ಯಾಪ್ತಿಗೆ ಬರುವ ಸಾಧ್ಯತೆಯಿದೆ.
ತುಮಕೂರು ಜಿಲ್ಲಾ ಪೊಲೀಸ್ ಇಲಾಖೆಯು ಸಾರ್ವಜನಿಕರ ಸುರಕ್ಷತೆಗೆ ಬದ್ಧವಾಗಿದ್ದು, ಯಾವುದೇ ರೀತಿಯ ಅಕ್ರಮ ಚಟುವಟಿಕೆಗಳಿಗೆ ಕಡಿವಾಣ ಹಾಕಲು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಸಾರ್ವಜನಿಕರು ಯಾವುದೇ ಅನುಮಾನಾಸ್ಪದ ಚಟುವಟಿಕೆಗಳನ್ನು ಪತ್ತೆಹಚ್ಚಿದಲ್ಲಿ ಸ್ಥಳೀಯ ಪೊಲೀಸ್ ಠಾಣೆಗೆ ತಿಳಿಸಬೇಕು ಎಂದು ಪೊಲೀಸರು ಮನವಿ ಮಾಡಿದ್ದಾರೆ.
*ತುಮಕೂರು ಜಿಲ್ಲಾ ಪೊಲೀಸರ ಕಾರ್ಯಾಚರಣೆಗಳು ಮತ್ತು ನವೀಕರಣಗಳಿಗಾಗಿ ಸಂಪರ್ಕದಲ್ಲಿರಿ.*
Post a Comment