ಬೀದರ, ಮಾರ್ಚ್ 23: ಅಖಿಲ ಭಾರತ ವೀರಶೈವ ಮಹಾಸಭೆಯ 24ನೇ ರಾಷ್ಟ್ರೀಯ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರು, ತಮ್ಮ ನೇಮಕಕ್ಕೆ ಬೀದರ ಜಿಲ್ಲೆಯ ಜನತೆಯ ಅಪಾರ ಪ್ರೀತಿ, ವಿಶ್ವಾಸ ಮತ್ತು ಆಶೀರ್ವಾದಗಳಿಗೆ ಹೃತ್ಪೂರ್ವಕ ಕೃತಜ್ಞತೆ ಸಲ್ಲಿಸಿದ್ದಾರೆ.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, “ಅಖಿಲ ಭಾರತ ವೀರಶೈವ ಮಹಾಸಭೆಯ 24ನೇ ರಾಷ್ಟ್ರೀಯ ಅಧ್ಯಕ್ಷರಾಗಿ ನನಗೆ ದೊರೆತಿರುವ ಈ ಗೌರವವು ಕೇವಲ ನನ್ನದೇ ಅಲ್ಲ, ನಮ್ಮ ಸಮಸ್ತ ಸಮಾಜದ ಗೌರವವಾಗಿದೆ. ಈ ಜವಾಬ್ದಾರಿಯನ್ನು ವಿನಯದಿಂದ ಸ್ವೀಕರಿಸುತ್ತಾ, ಸಮಾಜದ ಏಕತೆ, ಅಭಿವೃದ್ಧಿ ಮತ್ತು ಸರ್ವಾಂಗೀಣ ಪ್ರಗತಿಗಾಗಿ ನಿರಂತರವಾಗಿ ಶ್ರಮಿಸುವೆನು” ಎಂದು ತಿಳಿಸಿದರು.
ಬೀದರ ನಾಡಿನ ಗೌರವವನ್ನು ಮತ್ತಷ್ಟು ಎತ್ತರಕ್ಕೆ ತೆಗೆದುಕೊಂಡು ಹೋಗುವುದು ತಮ್ಮ ಕರ್ತವ್ಯ ಎಂದು ಅವರು ಸಂಕಲ್ಪಿಸಿದರು. ಸಮಾಜದ ಅಭ್ಯುದಯಕ್ಕಾಗಿ ತಮ್ಮ ಅನುಭವ ಮತ್ತು ಸಾಮರ್ಥ್ಯವನ್ನು ಸದುಪಯೋಗಪಡಿಸಿಕೊಳ್ಳಲಿದ್ದಾರೆ ಎಂದು ಹೇಳಿದರು.
“ನಿಮ್ಮ ನಂಬಿಕೆ, ಬೆಂಬಲವೇ ನನ್ನ ಶಕ್ತಿ. ಸದಾ ನಿಮ್ಮ ಸೇವೆಗೆ ಬದ್ಧನಾಗಿರುವೆನು” ಎಂದು ಅವರು ಭಾವುಕವಾಗಿ ನುಡಿದರು. ಈ ಮೂಲಕ ಬೀದರ ಜಿಲ್ಲೆಯ ಜನತೆಗೆ ಮತ್ತು ವೀರಶೈವ ಸಮಾಜದ ಮುಖಂಡರಿಗೆ ಅವರು ಧನ್ಯವಾದಗಳನ್ನು ಅರ್ಪಿಸಿದರು.
ಈಶ್ವರ್ ಖಂಡ್ರೆ ಅವರು ಬೀದರ ಜಿಲ್ಲೆಯ ಹಿರಿಯ ಮುಖಂಡರಾಗಿ, ಪ್ರಸ್ತುತ ಕರ್ನಾಟಕ ಸರ್ಕಾರದಲ್ಲಿ ಅರಣ್ಯ ಸಚಿವರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಅವರ ಈ ನೇಮಕವು ಸಮಾಜದಲ್ಲಿ ಸಂಭ್ರಮ ಮೂಡಿಸಿದೆ.
Post a Comment